ប្រជុំបទកំណាព្យខ្មែរ KHMER POEM

អោយកម្លាំងចិត្តខ្លួនឯង

2008-04-14T09:43:00.001-07:00

បើយើងបានឈ្លោះនិងភ័ក្តិមិត្ត	ចូរមើលអ្នកជិតគ្មានអ្នកស្នេហ៍
បើរៀនសៀវភៅធ្ងន់ជាងគេ	ចូរគន់រិះរេអ្នកអត់រៀន	។
បើយើងបានការងារលំបាក	មើលអ្នកតោកយ៉ាកដែលនៅកៀន
ថ្វីបើតែការងាររកគ្មាន	នេះយើងបានមានការងារធ្វើ	។
បើយើងនឿយហត់អស់កម្លាំង	ចូរប្រុងចិត្តតាំងមើលអ្នកឈឺ
ទោះមានការងារពុំអាចធ្វើ	យើងមានការធ្វើសំណាងណាស់	។
បើយើងរកប្រាក់ដុល្លាគ្មាន	មើលអ្នកសុំទានទាំងក្មេងចាស់
ខោអាវមួយកំប្លេចាស់ចាស់	យើងមានខោផ្លាស់អាវម៉ូដថ្មី	។
បើយើងធ្វើការងារខុសឆ្គង	ចូរកុំចងរងទុក្ខចិត្តអី
ថានេះជាបទពិសោធន៍ថ្មី	ខុសត្រូវផងក្តីរឿងធម្មតា	។
បើជីវិតនេះធ្លាក់ដុនដាប	មើលអ្នកដែលយ៉ាប់រងទុក្ខា
ធំជាងយើងលើសគណនា	នៅមានជីវ៉ាលើលោកិយ	។
ដោយ ឈន់ សុទ្ធិពង្ស

បងឃ្លាតតែកាយ But think of you!

2008-04-13T22:41:00.000-07:00

បងឃ្លាតតែកាយ But think of you!
Monday បងចង់ Visit ពៅ	Tuesday បងត្រូវ go hiking
Wednesday រៀមគិត buy a ring	Thursday បង bring it to you	។
Friday រៀមគិត say good bye	Saturday ឃ្លាតឆ្ងាយពីឆោមឆ្លៅ
Sunday airplane ហោះចេញទៅ	Please ពៅ don’t say I ទៅរៀន	។
I will sent you some Money	ទុកគ្រាន់ជីវី pay something
Powder bracelet និង ទំនិញ	ដែលរូបស្ងួន think ថាសំខាន់	។
Twelve months មិនយូរទេ darling	Please ពៅកុំ think I jilt you
When I return I គិតគូ	Marry និង you ជាប្រាកដ	។
ដកស្រង់ពី ៖ សប្បាយ សប្បាយ

អ្នករត់ម៉ូតូឌុប

2008-04-13T22:25:00.000-07:00

អ្នករត់ម៉ូតូឌុប
ទ្រីនៗទ្រឺនៗលឿនដូចហោះ	ឆ្វែលឆ្វាត់ផ្លេកផ្លោះកាត់ទីក្រុង
ឌុបអ្នកដំណើរមិនអែអង់	ត្រេចត្រង់ត្រឹមត្រូវមិនប្រមាថ	។
ថ្ងៃខ្លះឌុបតាយាយមីងអ៊	ថ្ងៃខ្លះក្រៀមក្រំរកស៊ីខាត
អត់មានអ្នកជិះសល់តែកាត	មុខជូរដូចត្មាតដេកចាំព្រៃ	។
ថ្ងៃខ្លះមុខរីកដូចគ្រាប់ជីរ	បានឌុបនារីស្រស់ពេកក្រៃ
ក្លិនក្លួនក្រអូបដូចចំប៉ី	រំភើបដួងចៃតែម្នាក់ឯង	។
រាល់ថ្ងៃដឹកឌុបអស់មនុស្សសត្វ	វត្ថុគ្រប់សព្វមានកញ្ច្រែង
ឧស្សាហ៍ធ្វើការយ៉ាងរអែង	ប្រឹងប្រែងញើសហូរប្តូរជីវិត	។
បាយត្រឹមបាតឆ្នាំងអាំងត្រីងៀត	ហូបចុកត្បិតត្បៀតមានកំរិត
សន្សំលុយកាក់ផ្ញើញាតិមិត្ត	ម៉ែឪក្រពិតឯស្រុកស្រែ	។
មួយថ្ងៃសន្សំខំតក់ៗ	រកស៊ីដង្ហក់មិនត្អូញត្អែ
របរសុចរិតមិនលួចគេ	សូមព្រះយាងថែលុះភ្លឺស្វាង	។
ដោយ ៖ អ្នកស្រី កែវ ច័ន្ទបូរណ៍

អនិច្ចាសិល្បៈខ្មែរ

2008-04-13T12:49:00.000-07:00

អនិច្ចាសិល្បៈខ្មែរ

គួរឱ្យអនិច្ចានិងហួសចិត្ត	វាគឺរឿងពិតមិនម៉ែនមុសា	នូវកេរ្តិ៍ដំណែលសិល្បៈដូនតា
	ពេលនេះប្រែជាធ្លាក់ក្នុងអវចី ។
បំបូរហូរហៀរក្រុមហ៊ុនផលិត	តែមិនបានគិតនិងឱ្យតម្លៃ	សិល្បៈដូនតាធ្លាប់តែល្បាញល្បី
	មិនបង្កើតថ្មីចាំតែចម្លង ។
អ្នកខ្លះតាំងខ្លួនជា Super Star	ច្រៀងស្រែកឡូឡាស្តាប់មិនទំនង	ខ្លះទៀត Copy យកបទរៀមច្បង
	ខ្លះអួតអ្នកផងច្រៀងបទបរទេស ។
បទចិនអង់គ្លេសកូរ៉េឬសៀម	ខ្មែរអាចច្រៀងតាមបានយ៉ាងពិសេស	មិនខ្វល់គេថាលួចបទបរទេស
	បើតែយ៉ាងនេះខ្មែរនឹងវឹកវ ។
មិនគួរចង់មានបានដោយការលួច	គេនឹងប្រដូចយើងថាជាចោរ	ដូចពួកអាសៀមចោទរឿងអង្គរ
	តើខ្មែរត្រេកអរទទួលយកទេ ?

ដោយៈ ខ្មែរមួយជាតិ ខ្ញុំ ឈន់ សុទ្ធិពង្ស មិនបានសុំអនុញ្ញាតពីម្ចាស់កំណាព្យទេ ដោយសាតែម្ចាស់កំណាព្យមិនបានប្រាប់អ៊ីម៉ែល ឬអ្វីដែលធ្វើអោយទាក់ទង់បាន ហើយក្នុងការផ្សាយនេះខ្ញុំបានកែប្រែពាក្យខ្លះ ដូចជា Super Star នឹង Copy ប្រសិនបើម្ចាស់កំណាព្យបានអានឬមានមតិយោបល់សូមអញ្ជើញទាក់ទង់ខ្ញុំបាទគ្រប់ពេលវេលា ។

ឱវាទព្រះពុទ្ធ

2008-04-13T12:47:00.001-07:00

ព្រះពុទ្ធឱវាទបីប្រការ	ទុកជាសាសនាព្រះជិនស្រី
ប្រដៅសត្វលោកទាំងប្រុសស្រី	បានសុខសួស្តីដូចប្រាថ្នា	។
ទីមួយហាមសាងអំពើរបាប	លាមកឆ្អេះឆ្អាបគ្រប់អាត្មា
ដូចជនជាប់គុកគួររអា	បានមានផល្លាគួរស្មាលា	។
កុំសាងអាក្រក់នាំក្តីទុក្ខ	បាបជាជង្រុកកម្មវេរា
បីដូចស្រមោលយើងគ្រប់គ្នា	តាមគ្រប់វេលាទាំងយប់ថ្ងៃ	។
ទីពីរត្រូវសាងអំពើល្អ	កុសលបវរអចិន្ត្រៃយ៍
សន្តោសសង្គ្រោះអធ្យាស្រ័យ	ការមានតម្លៃត្រូវខ្ញីឃ្មាត	។
សាងល្អជាថ្នូរដូរយកសុខ	ជាស្បៀងកប់ទុកកុំរវាត
ជាតិនេះជាតិក្រោយគ្មានទុក្ខបៀត	បុណ្យជួយគ្រប់ជាតិដល់និពាន	។
ទីបីអប់រំទូន្មានចិត្ត	ឱ្យល្អប្រណីតមិនបំពាន
កុំល្មោភចង់បានមិនខ្មាសអៀន	សន្តោសត្រូវរៀនមានមេត្តា	។
ចិត្តជាប្រមុខជាប្រធាន	ទប់ចិត្តទើបមានក្តីសុខា
កុំបីភ្លើតភ្លើនក្នុងទោសា	ពាលាមោហាអបាយមុខ	។
ឱវាទទាំងបីត្រូវចងចាំ	ធ្វើតាមបណ្តាំព្រះផ្តាំទុក
គ្រប់ពេលវេលាជាត្រីមុខ	យើងពិតបានសុខសាន្តរៀងអើយ

ដោយ ភិក្ខុ វ៉ង់ សុភស្ត ខ្ញុំបាទ ឈន់ សុទ្ធិពង្ស បានទទួលការអនុញ្ញាតឱ្យផ្សាយបទកំណាព្យនេះពីព្រះតេជគុណ ហើយ

ស្រឡាញ់ស្ទើរតែលេប

2008-04-13T12:46:00.001-07:00

ឱ ! កែវនិមល	ចិត្តបងខ្វាយខ្វល់	ព្រោះតែនឹកស្រី
បងស្ទើរតែឆ្កួត	ភ្លឹកស្មារតី	ចង់ប្រាប់ពិសី
	ថាបងស្រឡាញ់ ។
ចង់ស្រែកឱ្យលាន់	ឱ្យបានរាប់ពាន់	ពាក្យថាស្រឡាញ់
រូបអូនស្អាតណាស់	សក់រួញអង្កាញ់	បងសូមស្រឡាញ់
	តែអូនមួយនាក់ ។
ជួនកាលបងខឹង	ពេលកែវព្រលឹង	មានប្រុសរាក់ទាក់
បងប្រច័ណ្ឌអូន	តែរូបស្រីម្នាក់	បងសូមរួមរ័ក
	លុះអវសាន ។
ទោះកើតជាតិណា	បងសូមប្រាថ្នា	ជួបកែវកល្យាណ
គ្រប់ភពគ្រប់ជាតិ	ផ្ញើជីវិតប្រាណ	សូមឱ្យបងបាន
	ជួបតែពៅស្រី ។
ពេលអូនស្ងាត់ឈឹង	បងព្រួយទន្ទឹង	មើលតែផ្លូវស្រី
ថាតើរូបអូន	សុខទុក្ខឬអ្វី ?	បងស្ទើរតែក្ស័យ
	ព្រោះតែព្រួយអូន ។
សូមអូនមេត្តា	ទៅណាមកណា	រក្សាថែខ្លួន
ឱ្យដំណឹងផង	តាមអ៊ិ-មេលអូន	កុំភ្លេចណាស្ងួន
	ព្រោះបងទន្ទឹង ។

ដោយៈ ឈន់ សុទ្ធិពង្ស

បណ្តាំចុងក្រោយរបស់មាតាបិតា

2008-04-13T12:45:00.001-07:00

ប៉ាម៉ាក់គាត់តែងប្រាប់ខ្ញុំថា	ឱ្យខំធ្វើការសន្សំប្រាក់
រកបានហើយត្រូវចេះទុកដាក់	ព្រោះអំណាចប្រាក់ជួយយើងបាន	។
កូនអើយបើយើងរកប្រាក់គ្មាន	អ្នកផងបំពានលើខ្លួនប្រាណ
គេមើលថោកកូនដូចតិរច្ឆាន	កូនគង់តែបានជួបក្តីទុក្ខ	។
ប៉ាម៉ាក់មិនចង់បានអ្វីទេ	ចង់ឃើញមាសមេបានក្តីសុខ
មុនគ្រាខ្លួនផុតកម្មអស់ទុក្ខ	ពីនេះទៅមុខគ្មានម៉ាក់ប៉ា	។
ពេលម៉ាក់ប៉ាស្លាប់ចាកកូនទៅ	សូមកូនមាសពៅចុងរក្សា
តាំងខ្លួនឱ្យខ្ជាប់ក្នុងធម៌អាថ៌	ព្រមទាំងរក្សាប្រទេសផង	។

ដោយៈ ឈន់ សុទ្ធិពង្ស

ដំបូន្មានមាតាបិតា

2008-04-13T12:44:00.001-07:00

កូនថាសម័យទំនើបថ្មី	ត្រូវទិញឡានថ្មីទើបសង្ហា
ទាំងទូរសព្ទនាឡិកា	ទៅណាមកណាមិនខ្មាសគេ	។
ឯប៉ាម៉ាក់គាត់បានពោលថា	ឡានថ្មីនោះណាមិនបាច់ទេ
ទូរសព្ទនាឡិកាទ្វេ	គ្រាន់មានដូចគេក៏បានហើយ	។
កូនម៉ែគួរតែសន្សំប្រាក់	ត្រូវផ្ញើទុកដាក់ក្នុង Bank អឺយ
ខំរកស៊ីកុំធ្វើព្រងើយ	គ្រាខ្លួនចាស់ហើយមិនលំបាក	។
ទោះកូនមានទូរសព្ទថ្មី	ពេលកូននិយាយប្រាក់ចេញចាក
អស់ប្រាក់ហើយកូនគង់លំបាក	ព្រោះខ្មែរនោះយ៉ាករកប្រាក់ណាស់	។

ដោយៈ ឈន់ សុទ្ធិពង្ស

ចេះ

2008-04-13T12:42:00.000-07:00

ចេះមួយប្រាកដហត់និងប្រាក់	តាមហៅមកដាក់ណែនពេញទូ
មិនបាច់លីសែងក្រែងរអ៊ូរ	ប្រាក់រត់មកសួររកនៅផ្ទះ	។
ចេះពីរចេះដែរតែនៅស្ទើរ	ចេះមិនគ្រាន់បើបានតែស្ទាក់
ចេះគេងបន្លំផ្សំនិងប្រាក់	ចេះនោះពិតជាក់ខាងបំផ្លាញ	។
ចេះបីចេះហួសជួសជាជ្រួល	ចេះនោះមិនស្រួលកើតកាប់ចាក់
ចេះបានតែទុក្ខនាំដល់រាស្ត្រ	ចេះនោះជាផេះដល់សង្គម	។
ចេះបួនជួនជាប់គាប់អ្នកក្រ	ចេះនោះមិនល្អរាស្ត្រស្រែកយំ
ចេះដែរតែចេះបង្ហិន	ចេះនោះគឺចិនបានចំណេញ	។

នៅសម័យបូរាណខ្មែរសមបូរណ៌អ្នកចេះច្រើន ថ្វីត្បិតតែពុំបានទៅរៀននៅបរទេស តែខ្មែរកាលណោះធ្វើអ្វីបានដោយខ្លួនឯង ។ លុះក្រោយ ៗ មកកូនខ្មែរបានទៅរៀន នៅបរទេសច្រើន ហើយវិលត្រឡប់ចូលមកស្រុកវិញ ស្រុកទេសក៏អន់ថយទៅ , តើ មកអំពីមូលហេតុអ្វី ??? ដោយៈ ស៊ិន ដារាវុធ --------------------------- Washington, USA

ចាស់សម័យថ្មី

2008-04-13T12:40:00.000-07:00

ចាស់ខ្មែបូរាណមានចិត្តសុភាព	ចាស់ទុំចិត្តរាបមាយាទប្រពៃ
មិនដូចចាសខ្មែរនាសម័យថ្មី	ចាស់ណង់ឃើញស្រីងាកសឹងបាក់ករ	។
ខ្លួនចាស់ចិត្តព្រើលលបមើលតែក្មេង	ធម៌អាថ៌វង្វេងត្បិតចាស់សក់សរ
ធ្វើខ្លួនឥតទាស់កម្លោះអង្វរ	មើលឃើញស្រីល្អឈរស្រក់ទឹកមាត់	។
ធ្វើឫកដូចក្មេងលេងសុទ្ធឡានថ្មី	សប្បាយភ្លេចយាយនៅឯវត្ត
ចាស់នេះចាស់ណង់ចង់គេចវត្ត	ចាស់ហ្នឹងប្រាកដអវិជ្ជា	។
ដើរលេងហ៊ឺហាឡានដូរម៉ូដ	ចាយលុយរាប់កោដិតែនិងស្រី
សប្បាយភ្លេចខ្លួនពួនភ្លេចយាយ	ចាយអស់ប្រាក់ស្រីសុំបាយបាយ	។
តាអើយឈប់ទៅចៅសុំអង្វរ	តាមានសក់សរអាសូរដល់យាយ
តាឈប់ដើរលេងនាំក្មេងមើលងាយ	អាសួរតែយាយមានចិត្តស្មោះសរ	។
តារាំនិងក្មេងជ្រែងជើងចង់ដួល	ភ្លេងរ៉ក់អែនរ៉ូលតាស្រែកបន្ទរ
ភ្លេចបទសារ៉ាវ៉ាន់លេងតែឌីស្កូ	តាស្រែកបន្ទររាំទន់ជើងដៃ	។
ធ្វើករងិកង៉ក់ដូចព្រាប សុវត្ថិ	រាំញ៉ាក់កន្ត្រាក់លើកជើងខ្លៃ ៗ
តារាំបទរ៉ក់កាច់ក្មេងសម័យ	រាំចង្វាក់ថ្មីជាមួយស្រីស្អាត	។

ដោយៈ ឈន់ សុទ្ធិពង្ស បទកំណាព្យនេះតែងតាមអត្ថន័យរបស់លោក ស៊ិន ដារាវុដ

ចប់បរិញ្ញាស្នេហាតាមចោម

2008-04-13T12:36:00.000-07:00

ចប់បរិញ្ញាស្នេហាតាមចោម
អីយ៉ាពីដើមកាលខ្ញុំក្រ	រស់ទាំងត្រដរខំសិក្សា
ខិតខំរៀនសូត្រយកបរិញ្ញា	គ្មានទេស្នេហាកាលគ្រានោះ	។
ជិះកង់កញ្ចាស់ម៉ែទិញឱ្យ	ខ្វះមុខខ្វះក្រោយខិតខំណាស់
រៀនសូត្រមិនខ្ជិលបាត់ពីផ្ទះ	ស្វែងរកចំណេះប្រចាំកាយ	។
សំលៀកបំពាក់មិនសមរម្យ	មិនពេញនិយមអ្នកឆើតឆាយ
មានតែទឹកត្រីញ៉ាំលាយបាយ	មិត្តភក្តិទាំងឡាយគេមិនក្បែរ	។
ខ្ញុំដឹងរឿងហ្នឹងតែតស៊ូ	ខឹតខំផ្តាច់ប្តូរមិនទំនែរ
ព្រោះយើងគ្មានពឹងដូចរូបគេ	សម្បត្តិមានតែគឺបរិញ្ញា	។
ជាប់បរិញ្ញាប័ត្រលែងភ័យព្រួយ	ម៉ែពុកលោកជួយគ្រប់កិច្ចការ
សប្បាយចិត្តណាស់នាំបរិញ្ញា	ចប់កិច្ចសិក្សាជូនម៉ែពុក	។
ម៉ែសប្បាយចិត្តសរសើរកូន	នឿយហត់បាត់សូន្យយើងផុតទុក្ខ
ឪខ្ញុំពេលនេះសែនខ្ពស់មុខ	អួតប្រាប់អ្នកស្រុកពីរឿងកូន	។
ពីដើមគ្មានគេមកស្នេហ៍សោះ	ព្រោះយើងក្រៀមក្រោះមានតែខ្លួន
ឥឡូវបរិញ្ញាឡើងហំហួន	មិត្តភក្តិជុំខ្លួនមកសុំស្នេហ៍	។
តែណ្ហើយរឿងស្នេហ៍ទុកមួយដុប	អន្ធការពេលយប់កុំអាលក្បែរ
ធ្វើការងារសិនកុំទំនេរ	សងគុណពុកម៉ែទើបកត្តញ្ញូ	។
ឥឡូវសន្សំលុយបានហើយ	ស្នេហ៍នៅបង្កើយលួចស៊ីញ៉ូ
កូនគេអ្នកមានហ៊ានមកប្តូរ	កុំជោរ នេះគឺបរិញ្ញាប័ត្រ	។

ដោយៈ ណុប ច័ន្ទតារា Long Beach, Colifornia, U.S.A cnop@juno.com

គ្មានបរទេសណាស្រឡាញ់ខ្មែរជាងខ្មែរឡើយ

2008-04-13T12:34:00.000-07:00

ខ្ញុំបាទជាអ្នកកវីថ្មី	មានរឿងចង់ស្តីប្រាប់យាយតា
ព្រមទាំងមីងមាគ្រប់គ្រួសារ	ដើម្បីដឹងសារៈសំខាន់	។
យើងជាខ្មែរមិនស្រឡាញ់ខ្មែរ	នាំគ្នាងាកបែរទៅតៃវ៉ាន់
កូនស្រីខ្លួនស្មើនឹងអាត្ម័ន	ឃើញថៃតៃវ៉ាន់លើកឱ្យភ្លាម	។
ស្រីខ្មែរនៅឯបរទេស	មិនដែលផុតជៀសការគម្រាម
គេមើលថោកខ្មែរជ្រៅដល់ឈាម	អស់ពួកអាសៀមខ្លាំងណាស់ដែរ	។
ថ្វីបើតែនៅក្នុងកំណាព្យ	គេតែងជាកាព្យឱ្យស្អប់ខ្មែរ
តើព្រោះហេតុអ្វីយើងនៅតែ	នាំគ្នាដង្ហែលើកកូនឱ្យ	។

ដោយៈ ឈន់ សុទ្ធិពង្ស

គុណមាតា

2008-04-13T06:35:00.000-07:00

	ខ្ញុំបាទសូមគោរពមកដល់	លើកដៃតម្តល់លើសិរសា
	ចំពោះមីងមាលោកយាយតា	សូមប្រោសមេត្តាតាមដានស្តាប់	។
	សូមលើកយកពីគុណមាតា	នៅក្នុងតម្រាច្រើនសែនច្បាប់
	គុណមាតាមិនអាចរ៉ាយរ៉ាប់	ខ្ញុំបាទសូមប្រាប់ថាច្រើនណាស់	។
	មាតាមាតុប្រែថាម៉ែ	បកស្រាយជាខ្មែរបានន័យច្បាស់
	អ្នកឱ្យកំណើតទាំងក្មេងចាស់	សូមលោកអង្គម្ចាស់បានជ្រាបន័យ	។
	តទៅខ្ញុំបាទសូមនិទាន	ពីកូនដែលមានចិត្តអប្រិយ
	តវ៉ាម៉ែខ្លួនដោយសម្តី	ហ៊ានទារហ៊ានស្តីសុំលុយកាក់	។
(កូន)	ម៉ែអើយ ! លោកម៉ែពេលប្រើខ្ញុំ	នូវការធំដុំកុំភ្លេចប្រាក់
	ខំធ្វើការម៉ែដោយទុកដាក់	ទើបកូនសុំប្រាក់ពីលោកម៉ែ	។
	ទោះបីប្រើកូនឱ្យលាងចាន	ខ្លួនប្រាណកូនបាននឿយហត់ដែរ
	អញ្ចឹងទើបកូនសុំប្រាក់ម៉ែ	ថាតើលោកម៉ែឱ្យឬអី ?	។
(ម៉ែ)	ឱ ! កូនសំលាញ់មាសម៉ែអើយ	ចុងកុំព្រងើយខ្ជិលពេកក្រៃ
	កូនខំធ្វើការឱ្យពេញដៃ	កូនចង់បានអ្វីម៉ែឱ្យបាន	។
	ប្រាំបួនខែកន្លងផុតទៅ	កូនម៉ែមាសពៅផ្ញើខ្លួនប្រាណ
	គេងលក់ក្នុងពោះយ៉ាងសម្រាន្ត	ម៉ែមិនដែលបានគិតប្រាក់ឡើយ	។
	ពេលកូនធំឡើងម៉ែឱ្យបៅ	ថ្នាក់ថ្នមកូនពៅមិនកន្តើយ
	បីកូនឱ្យគេងលើពួកខ្នើយ	បក់ឱ្យរហើយខ្លាចកូនក្តៅ	។
	សត្វរុយស្រមោចជាសត្វល្អិត	មិនឱ្យមកជិតកូនមាសពៅ
	បីរូបកូនមកថ្នមលើភ្លៅ	សុំកូនមាសពៅបានក្តីសុខ	។
	ពេលកូនត្រូវការរៀនសិក្សា	ម៉ែខំធ្វើការពេញបន្ទុក
	ទោះបីរងាក្តៅរងទុក្ខ	ម៉ែខំសំរុកធ្វើចំការ	។
	ខ្លាចកូនពិសីអត់ប្រាក់រៀន	ទោះខ្លួនអត់ខ្លានមិនដែលថា
	ឱ្យតែកូនរស់បានសិក្សា	នោះក្តីប្រាថ្នានៃដួងចៃ	។
	ពេលកូនសំរេចការសិក្សា	ម៉ែរកសង្សារឱ្យកូនថ្លៃ
	ចង់បានកូនអ្នកណាសូមស្តី	បារាំងខ្មែរថៃម៉ែរកឱ្យ	។

មិត្តអ្នកអានជាទីគោរព កំណាព្យនេះតែងឡើងដោយហេតុការណ៍ពិតប្រាកដមួយ ក្នុងសង្គមខ្មែរយើងនាបច្ចុប្បន្ននេះ ខ្ញុំបានជួបគ្រួសារមួយហើយគាត់មានកូនប្រុស ម្នាក់ពេលគាត់ប្រើឱ្យធ្វើការកូនតែងតែទារប្រាក់ពីគាត់ទើបកូននោះធ្វើការដោយ ហេតុតែកូននោះចង់បានប្រាក់ទុកទិញហ្គេមលេង។ ឈន់ សុទ្ធិពង្ស

បងសូមលាអូនទៅសិក្សា

2008-04-13T06:33:00.000-07:00

បងសូមលាអូនទៅសិក្សា	តាមពាក្យសន្យាប៉ាម៉ាក់បង
សូមអូនថែរក្សាខ្លួនផង	ព្រោះអីរូបបងឆ្ងាយពិសី	។
មាសស្ងួនកុំបារម្ភទុក្ខព្រួយ	ចិត្តបងមានមួយនោះគឺស្រី
អូនជាខ្មែរមារយាទថ្លាថ្លៃ	បងសូមបេតីតែស្រីខ្មែរ	។
សូមអូនអាសូរដល់ចិត្តបង	កុំងាកបែរខ្នងរាប្រួលប្រែ
សេចក្តីស្មោះត្រង់នៃស្រីខ្មែរ	អូនគប្បីថែខ្ជាប់ក្នុងប្រាណ	។
បងសូមសន្យានិងអូនថា	ពីរឆ្នាំទៀតណាកែវកល្យាណ
នោះយើងទាំងពីរគង់តែបាន	សេចក្តីសុខសាន្តនៃស្នេហ៍យើង	។

ដោយៈ ឈន់ សុទ្ធិពង្ស